INTERUPSHON DI KORIENTE

Interupshon di koriente
Interupshon di koriente ta konsekuensha di un problema den e sistema di produkshon òf distribushon. Koriente ta bai inesperadamente debí na sierto kousanan den e sistema di distribushon: bientu fuerte, trabou di kontratista den besindario, problema ku voltahe na un hende su kas, un kabel ku a kibra. Nos ta splika kontratistanan unda tin kabel bou di tera, promé ku nan kuminsá koba, pa nan traha di un manera safe. Ku regularidat nos Departamento Tékniko ta hasi inspekshon na supstashonnan, pa minimalisá baimentu di koriente i fluktuashon di voltahe.

Baimentu di koriente den e sistema di produkshon ta resultado di insufisiente kapasidat pa kumpli ku e demanda di elektrisidat. Esei ta resultado di problemanan tékniko den e sistema di produkshon.


Programa di “schakel” (kita koriente bario pa bario)
Den kaso ku interupshon di koriente tin komo konsekuensha insufisiente kapasidat pa suministrá henter e isla ku elektrisidat, AQUALECTRA ta apliká un programa di schakel, pa sigurá ku no bini un black out total.
Durante ora di ofisina ta duna prioridat na klientenan industrial i komersial. Den oranan di anochi klientenan den bario residensial tin preferensha.
Den kaso di interupshon severo, AQUALECTRA ta informá públiko via korant i radio.